საქართველოს ცენტრალური საარჩევნო კომისიის (ცესკო) დელეგაცია სერბეთის რესპუბლიკაში 2026 წლის 25 ოქტომბერს გამართულ ეროვნული ასამბლეის რიგგარეშე არჩევნებს დააკვირდა. დელეგაციის შემადგენლობაში შედიოდნენ ცესკოს წევრები გიორგი ჭიქაბერიძე და დიმიტრი ჯავახაძე, აჭარის ავტონომიური რესპუბლიკის უმაღლესი საარჩევნო კომისიის (უსკო) თავმჯდომარე პაატა კეშელავა და უსკოს აპარატის საზოგადოებასთან ურთიერთობის განყოფილების უფროსი ნესტან ნაკაშიძე.
დელეგაციის წევრები არჩევნებზე დაკვირვებაში სერბეთის რესპუბლიკური საარჩევნო კომისიის თავმჯდომარის მოწვევით, საერთაშორისო დამკვირვებლების სტატუსით მონაწილეობდნენ. არჩევნების დღეს ისინი ბელგრადში რამდენიმე საარჩევნო უბანზე კენჭისყრის მიმდინარეობას აკვირდებოდნენ.
ვიზიტის ფარგლებში დელეგაციის წევრებმა ორმხრივი შეხვედრა გამართეს სერბეთის რესპუბლიკური საარჩევნო კომისიის წევრ ველკო პეროვიჩთან და გაეცნენ არჩევნების მომზადებისა და ჩატარებისთვის განხორციელებულ საქმიანობას. სხვა მოწვეულ დელეგაციებთან ერთად ასევე მონაწილეობა მიიღეს საერთო პლენარულ შეხვედრაში, რომელიც კომისიის თავმჯდომარის მოადგილის მარკო იანკოვიჩის ხელმძღვანელობითა და კომისიის წევრის მარია იოვანოვიჩის მონაწილეობით გაიმართა.
სერბეთის რესპუბლიკური საარჩევნო კომისიის ოფიციალური მონაცემებით, არჩევნებისთვის ამომრჩეველთა საბოლოო რაოდენობა 6 451 292-ს შეადგენდა. ქვეყნის ტერიტორიაზე კენჭისყრისთვის განსაზღვრული იყო 8 299 საარჩევნო უბანი. ამომრჩევლები ეროვნული ასამბლეის 250 დეპუტატს პროპორციული საარჩევნო სისტემით ირჩევდნენ. არჩევნების ადმინისტრირებას რესპუბლიკური საარჩევნო კომისია, ადგილობრივი საარჩევნო კომისიები და საუბნო საარჩევნო კომისიები ახორციელებდნენ.
„ჩვენ მიერ მონახულებულ საარჩევნო უბნებზე კენჭისყრის პროცესი ორგანიზებულად მიმდინარეობდა. დაკვირვებამ შესაძლებლობა მოგვცა, უშუალოდ გავცნობოდით სერბი კოლეგების მუშაობის პრაქტიკას. ამგვარი ვიზიტები ხელს უწყობს პროფესიული გამოცდილების გაზიარებასა და საარჩევნო ადმინისტრაციებს შორის თანამშრომლობის გაღრმავებას“, — განაცხადა უსკოს თავმჯდომარემ პაატა კეშელავამ.